Azərbaycan, Bakı, 7 aprel /Trend, müxbir A.Axundov/
Azərbaycan Turizm Assosiasiyası ölkənin turizm bazarının inkişafının stimullaşdırılması məqsədilə mövcud qanunvericiliyə düzəlişləri hazırlamaq üçün Mədəniyyət və Turizm Nazirliyinə bir sıra təkliflər göndərib. Bu təkliflərə baxılır və onlar öz nəticələrini verməyə başlayır. Bu barədə çərşənbə günü Trend-ə assosiasiyanın rəhbəri Nahid Bağırov məlumat verib.
"Gördüyünüz kimi, proses artıq gedir, turizm bazarının inkişafı üzrə qanun layihəsi hazırlanır", - Bağırov bildirib.
2011-ci il Azərbaycan Prezidenti tərəfindən "Turizm ili" elan edilib. Bununla əlaqədar turizmin gələcəkdə inkişafı, turistlərə vizaların verilməsinin sadələşdirilməsi və bu sahədə şəffalığın artırılması məqsədilə müvafiq qanun layihəsi hazırlanıb.
Bağırovun sözlərinə görə, assosiasiyanın təklifi başlıca olaraq, xarici turistlərə vizaların verilməsinin və vergi tutulmasının sadələşdirilməsidir.
Assosiasiyanın təklifləri arasında Bağırov bunları qeyd edib:
- Bələdçilər üçün Bakı şəhəri və Abşeron yarımadası haqqında vahid metodiki vasitələrin hazırlanması və təsdiqlənməsi;
- turizm şirkətləri, mehmanxanalar və restoranların əməkdaşlarının hazırlıq səviyyəsinin artırılması üçün ixtisaslaşdırılmış treninqlərin keçirilməsi;
- Azərbaycanın bütün sərhəd-buraxılış məntəqələrində turistlərə müvafiq xidmətlərin göstərilməsi üçün turizm şirkətlərinə və təşkilatlara yerlərin ayrılması;
- orta və kiçik turizm biznesinə dəstək göstərilməsi məqsədilə təyinatı üzrə güzəştli kreditlərin verilməsi;
- Azərbaycana turist axınının güclənməsi üçün turist vizalarının verilməsinin sadələşdirilməsi üzrə təkliflərin hazırlanması;
- Turizm sahəsi işçiləri üçün ayrıca peşə gününü elan olunması və onların dövlət tərəfindən mükafatlandırılması üzrə təkliflərin hazırlanması;
- Azərbaycanın turizm regionlarına xarici ölkə səfirliklərinin nümayəndələri üçün infoturların təşkili;
- mehmanxanaların və mehmanxana tipli obyektlərin Azərbaycan üzrə soraq kitabçaları ilə təmin olunması və s.
Onun sözlərinə görə təkliflər həmçinin xarici vətəndaşlarının turizmin tarixi, dini, mədəni, kulinar və digər növləri üzrə məlumatlandırılmasına yönəldilmiş müxtəlif festivallar, sərgilər və digər tədbirlərin təşkili və təkmilləşdirilməsinə də aiddir.
Bağırovun sözlərinə görə, il ərzində ölkədə "Turizm İli" ilə bağlı çoxlu sayda tədbirlərin keçirilməsi planlaşdırılır.
"Sentyabr-oktyabrda Turizm Assosiasiyası tərəfindən beynəlxalq sərginin keçirilməsi planlaşdırılır", - Bağırov bildirib.
Turizm bazarının inkişafı haqqında qanun layihəsinə görə, bundan sonra turistlərin turizm şirkətləri vasitəsilə viza almaları daha da sadələşdiriləcək. Turizm şirkətləri viza almaq üçün elektron qaydada (İnternet vasitəsilə) Azərbaycanın səfirlik və konsulluqlarına birbaşa müraciət edə bilərlər. Səfirlik və konsulluqlar müraciətlərə 15 gündən gec olmayaraq baxacaqlar və vizaların verilməsini təmin edəcəklər. Vizalar elektron formada tərtib olunacaq və sifariş edən turizm şirkətinə e-mail vasitəsilə göndəriləcək. Bu şəkildə verilən vizalar pasporta daxil edilmir, turistlərə sərhəd-buraxılış məntəqəsindən keçərkən pasportla birgə təqdim olunur. Vizaların verilməsi üçün lazım olan sənədlərin siyahısı, ərziə forması, dövlət rüsumu haqında məlumat və digər zəruri məlumatlar Azərbaycanın Xarici İşlər Nazirliyinin və xarici ölkələrdəki səfirlik və konsulluqlarının İnternet-saytlarında yerləşdiriləcək.
