Azərbaycan, Bakı, 19 aprel /Trend, müxbir N.İsmayılova/
Asiya İnkişaf Bankı (AİB) Azərbaycanda su təchizatı və sanitar xidmətlər sisteminin yaxşılaşdırılması layihəsi üçün çoxtranşlı maliyyələşmədən (MFF) birinci kreditin verilməsi prosesinin sürətləndirilməsinə yönəlib. Trend-in məlumatına görə, bu barədə AİB-in Azərbaycandakı nümayəndəliyinin rəhbəri Olli Norojona bildirib.
"Biz "Azərsu" ASC ilə birinci tranşın verilməsini sürətləndirmək üçün fəal danışıqlar aparırıq və hesab edirəm ki, tezliklə bu işlərin müsbət nəticəsini görəcəyik", - o deyib.
Göyçay və Naxçıvanda su təchizatı və sanitar xidmətlər sisteminin yaxşılaşdırılması üzrə layihənin ilkin dəyəri 39,9 milyon dollar təşkil edib. Layihənin maliyyələşdirilməsi üçün Asiya bankı ilkin olaraq 30 milyon dollar kredit ayırıb, 9,9 milyon dollar isə ölkə hökumətinin payına düşüb. İki rayonda işlərin tam əhatə olunması üçün bank MFF-in vəsaitləri hesabına 75 milyon dollar (birinci tranş), Azərbaycan hökuməti isə 25 milyon dollar ayırıb. MFF-in ilk tranşı AİB-in adi kredit resurslarından ayrılıb: illik libor + 0,2 faiz dərəcə üzrə dörd il güzəştli dövr olmaqla 24 il müddətinə.
İlk tranşın vəsaitləri beş il əvvəl təsdiqlənmiş Ağdaş, Göyçay və Naxçıvanda su təchizatı sisteminin və sanitar xidmətlərin yaxşılaşdırılması üzrə layihənin bahalaşması ilə əlaqədar əlavə xərclərin ödənilməsi üçün nəzərdə tutulub. Bu layihənin dizaynı 2004-cü ildə hazırlanıb. Bu müddətdə tikinti materiallarının, əsasən də kanalizasiya materiallarının qiymətləri xeyli qalxıb və xərclərin artması müşahidə olunur. Azərbaycan tərəfinin təklifi ilə layihədə nəzərdə tutulan rayonlarda kanalizasiya sistemində müasir qurğuların qurulması da onun qiymətinə təsir göstərir. AİB-in layihəsində seçilmiş rayonlarda su təchizatının və kanalizasiyaların tam bərpası nəzərdə tutulur.
Layihənin əhatəsini genişləndirmək üçün AİB 350 milyon dollar məbləğində MFF-in ikinci tranşını ayırmağa hazır olduğunu bildirib. Bu vəsaitlər Ağdaş, Ağcabədi, Beyləqan və Balakəndə su təchizatı sisteminin və sanitar xidmətlərin yaxşılaşdırılması üçün nəzərdə tutulub.
AİB-in 3-cü tranşı 175 milyon dollar məbləğində Bakı ətrafında mərkəzləşdirilmiş su təchizatı və kanalizasiya sisteminin yaradılması üçün gözlənilir.
Su təchizatı və kanalizasiya sahəsində aydın strategiya və islahatlar proqramı ilə dəstəklənən mərhələli investisiyalar nəzərə alınmaqla, multitranş maliyyələşməsi AİB və Azərbaycan hökuməti arasında səkkizillik əməkdaşlıq üçün əsas olacaq.
MFF-in Azərbaycanın su təsərrüfatı üçün maliyyələşmənin ümumi həcmi 2009-cu ilin sentyabrında Asiya İnkişaf Bankının Direktorlar Şurasında 600 milyon dollar həcmi ilə bəyənilib.
"Azərsu" SC-nin su layihəsi üzrə məsləhətçisi "AICO Consulting Ltd/European Consultans Organization" konsorsiumudur.
