Azərbaycan, Bakı, 16 may /Trend, müxbir A.Axundov/
Mayın 1-nə olan vəziyyətə görə, Azərbaycanda işsizlər qismində 39,9 min nəfər rəsmi qeydiyyatdan keçib ki, onlardan 43,2 faizi qadındır. Bu barədə bazar ertəsi Dövlət Statistika Komitəsindən məlumat verilib.
Keçən ilin müvafiq dövrü ilə müqayisədə işsizlərin sayı 1,48 faiz azalıb, ötən aya nisbətdə 0,5 faiz artıb. Ölkədə 1 vakant yerə 4 işsiz iddialıdır.
Hesabat dövrü ərzində ölkənin məşğul əhalisi 4591,1 min nəfər təşkil edib. Bununla yanaşı, cari ilin yanvar-mart aylarında muzdla işləyənlərin sayı 1362,1 min, dövlət sektorunda 850,9 min, özəl sektorda çalışanlar isə 494,6 min nəfər olub.
İstehsalat sahələrində muzdla işləyənlərin 20,2 faizi sənaye sahəsində, 2,6 fazi hasilatda, 5,7 faizi emal sənayesində, 5,1 faizi tikintidə, 2,8 faizi kənd, meşə təsərrüfatı, 2,3 faizi balıqçılıqda, 2,3 faizi istehsal və elektrik enerjisinin, qaz və istiliyin paylanması, 1,7 faizi su təcjizatı və tullantıların emalı sahəsində çalışır.
Xidmətlər sahəsində işləyənlərin 25,7 faizi təhsil sahəsində, 20 faizi topdan və pərakəndə ticarətdə, avtomobillərin, məişət məhsullarının və şəxsi istifadə üçün əşyaların təmirində, 10,1 faizi səhiyyə və sosial xidmətlərdə, 4,7 faizi nəqliyyat və anbar təsərrüfatında, 4,1 faizi istirahət, əyləncə və mədəniyyət sahəsində, 3,2 faizi elmi və texniki fəaliyyətdə, 1,8 faizi rabitə, 1,6 faizi maliyyə və sığorta fəaliyyətində, 0,7 faizi daşınmaz əmlak, icarə əməliyyatlarında, 4 faizi dövlət idarəsi və müdafiəsi, sosial təminat sahəsində və 1 faiz digər sahələrdə cəmləşib.
İşsizliyə görə müavinətin orta məbləği 179,2 manat olub.
Mayın 16-na olan rəsmi məzənnə 0,7907 AZN/USD təşkil edir.