Azərbaycan, Bakı, 18 may /Trend, müxbir A.Axundov/
Azərbaycan Sığortaçılar Assosiasiyasının (ASA) yeni nizamnaməsi üzərinə iş iyun-iyulda başlayacaq və bu ilin sonunadək davam edəcək. Bu barədə Trend-ə çərşənbə günü ASA-nın icraçı direktoru Azər Əliyev deyib.
"Bu ilin sonunda biz yeni nizamnamənin qəbul ediləcəyini gözləyirik", - Əliyev bildirib.
Onun sözlərinə görə, ASA-da baş verəcək struktur dəyişiklikləri haqqında danışmaq hələ ki çətindir.
"Bir tərəfdən hazırda bizdə mövcud olan struktur normal işləyir və çoxlarını qane edir, digər tərəfdən elə məqamlar var ki, o nəyi isə əks etdirmir. Tutaq ki, birinci nizamnamə qəbul ediləndə və ya assosiasiya yaradılanda bazarda bəzi indiki oyunçular olmayıb", - Əliyev bildirib.
Onun sözlərinə görə, ASA-nın strukturunda müəyyən amillər səbəbindən sığorta şirkətləri assosiasiyanın işində hələ ki o qədər də fəal iştirak etmirlər.
"Bu gün əksər sığorta şirkətləri həm sığorta bazarının iştirakçıları baxımından, həm də onların ümumiyyətlə Azərbaycanda sığortanın inkişafına töhfə verməsi baxımından ciddi potensiala malikdirlər. ASA-nın strukturunda müəyyən amillər səbəbindən sığorta şirkətləri assosiasiyanın işində hələ ki bir o qədər də fəal iştirak etmirlər", - Əliyev bildirib.
Bununla belə, onun sözlərinə görə, assosiasiyanın işinə tam cəlb edilmək imkanı indiki nizamnamədə də var.
"Reallıqda bu gün assosiasiya öz işini elə qurub ki, istənilən şirkəti, onun Müşahidə Şurasının üzvü olub-olmamasından asılı olmayaraq, cəlb etsin", - Əliyev vurğulayıb.
Onun sözlərinə görə, nizamnamə yenilənərkən üzvlük haqları məsələsinə baxılacaq. Hazırda hər bir şirkət üçün üzvlük haqqı ildə 5 min manat təşkil edir.
"Bu, bəziləri üçün çox, digərləri üçün azdır", - Əliyev qeyd edib.
Onun sözlərinə görə, bundan başqa, üzvlük haqlarını ödəməməkdə davam edən şirkətlərin məsələsi də müzakirə ediləcək. Bu, ödənişi vaxtında edən digər şirkətləri məyus edir.
"Assosiasiyanın məqsədi bazarın bütün iştirakçılarının uzaqlaşdırılması yox, birləşdirilməsidir, birləşmə könüllülük əsasında olmalıdır", - Əliyev əlavə edib.
ASA-nın icraçı direktoru əmin olduğunu bildirib ki, nə vaxtsa sığortaçıların şikayətlərinə baxa biləcək ASA yanında xüsusi komitə yaradılacaq.
"Hesab edirəm ki, müştərilər dövlət orqanlarına şikayət etməzdən əvvəl onların şikayətlərinə baxa biləcək struktur lazımdır. Bu, həm şikayətçilərin özü, həm də şikayətçi olduqları insanlar üçün sığortanın əksər nüanslarının təbliği və izahına görə yaxşı alət olacaq. Lakin təəssüf ki, sığortaçılar buna ehtiyatla yanaşırlar, yəqin onlar bunun necə işləyə biləcəyini dəqiq görmürlər. Lakin bu nə vaxtsa baş verəcək, bizə sadəcə olaraq vaxt lazımdır", - Əliyev bildirib.
ASA-nın təsisçilərinin sonuncu yığıncağında assosiasiya yanında xüsusi komitənin yaradılması məsələsi qeyri-müəyyən müddətə təxirə salınıb.
Azərbaycan Maliyyə Nazirliyi yanında Dövlət Sığorta Nəzarəti Xidməti bundan əvvəl ASA-ya belə komitə yaratmağı tövsiyə edib.
Bir müddət öncə Əliyevin dediyinə görə, bir sıra sığorta şirkətləri hesab edirlər ki, belə struktur çərçivəsində qəbul edilən qərar obyektiv olmayacaq və yalnız komitənin tərkibinə daxil olacaq sığorta şirkətlərinin nümayəndələrinin marağını müdafiə edəcək.
"Lakin mən bununla razı deyiləm. Onda biz gərək bütün komitələrə inanmayaq. Əslində belə strukturun iştirakçıları sığorta işinin peşəkarları və bütün sığortaçılar arasında nüfuza malik mütəxəssislər olmalıdırlar. Biz yaddan çıxarmamalıyıq ki, istənilən sığortaçı üçün qanun çərçivəsində müəyyən edilən hüquq və vəzifələr var və şirkətlərin maraqlarına müstəsna olaraq qanun çərçivəsində riayət olunmalıdır", - Əliyev qeyd edib.
2006-cı il dekabrın 29-da əsası qoyulan və 28 üzvü birləşdirən assosiasiyanın əsas məqsədi Azərbaycanda fəaliyyət göstərən sığorta şirkətlərinin, eləcə də təkrar sığorta şirkətlərinin inkişafına kömək göstərməkdən, onların sosial-iqtisadi, informasiya və digər proqramlarının inkişafı, göstərilən sahələrdə onların biliklərinin artırılmasından ibarətdir.
Azərbaycanda 28 sığorta və bir təkrar sığorta şirkəti fəaliyyət göstərir.