Azərbaycan, Bakı, 31 may /Trend, müxbir A.Axundov/
Azərbaycan-Pakistan lizinq şirkəti "MCB Lizinq" 2011-ci ildə nizamnamə kapitalını iki dəfə artırmağı planlaşdırır. Bu barədə çərşənbə axşamı Trend-ə şirkətin idarə heyətinin sədri Ramal Cəfərov deyib. İndi şirkətin nizamnamə kapitalı 842 105 manat təşkil edir.
"Bunlar planlardır, səhmdarların bununla bağlı son qərarı hələ ki yoxdur", - Cəfərov bildirib.
Hazırda Azərbaycanda lizinq şirkətlərinin əksəriyyətinin nizamnamə kapitalı 1 milyon manata qədərdir. Bu gün lizinqə verənlər yerli banklardan maliyyələşdirməni cəlb edirlər və şirkətlərin kapitallaşdırma səviyyəsi onlara xarici bankların və beynəlxalq maliyyə institutlarının kredit resusrlarını cəlb etməyə imkan vermir.
"Ansar Leasing" şirkəti kapital səviyyəsinə görə (5 milyon manat və ya 6,2 milyon dollar) ölkənin lizinq strukturlarından daha rəqabət qabiliyyətlisidir.
Şirkət 13 iyul 2010-cu il tarixdə fəaliyyətə başlamasını rəsmən elan edib. "MCB Lizinq" lizinq şirkəti ölkənin vergi orqanlarında 15 oktyabr 2009-cu il tarixində dövlət qeydiyyatdan keçib. Şirkətin nizamnamə kapitalı 1,5 milyon manat təşkil edir. "MCB Lizinq"in təsisçiləri iştirak payının 70 faizinə malik Pakistanın "MCB Bank LTD" şirkəti və Namiq Səfərovdur.
Pakistanın MCB bankının altı milyard dollardan çox aktivi, 1500 filialı var və dünyanın səkkiz ölkəsində təmsil olunub. O, əsas fəaliyyəti tekstil sənayesində və dünyanın aparıcı brendləri üçün məhsul istehsalında cəmləşən "Nishat Group" şirkətlər qrupuna daxildir.
Azərbaycanda rəsmən 22 lizinq şirkəti qeydiyyatdan keçib, lakin real olaraq lizinq xidmətləri təklif edən 11 aktiv lizinq şirkəti və bank fəaliyyət göstərir.
Mayın 31-nə olan rəsmi məzənnə 0,7894 AZN/USD təşkil edir.