Azərbaycan, Bakı, 13 iyun /Trend, müxbir E.İsmayılov/
TRACECA (Avropa - Qafqaz - Asiya) nəqliyyat dəhlizi çərçivəsində ikinci İnvestisiya Forumu 2012-ci ilin fevralında keçiriləcək. Trend-in məlumatına görə, bu barədə TRACECA-nın rəsmi saytı məlumat verib.
Forumda TRACECA-ya üzv ölkələrlə yanaşı, kommersiya bankları, beynəlxalq maliyyə institutları, investisiya və pensiya fondları, sığorta şirkətləri, operatorlar, nəqliyyat dəhlizi ilə bağlı assosiasiyalar, məsləhətçilər, eləcə də özəl şirkətlərin iştirakı planlaşdırılır.
Forumda Azərbaycanı Bakı - Böyük Kəsik dəmiryolunun yenidənqurulması və bərpası layihəsi təmsil edəcək.
TRACECA-nın ilk İnvestisiya Forumu 2010-cu ildə Brüsseldə keçirilib.
TRACECA Aİ və Şərqi Avropa, Cənubi Qafqaz və Mərkəzi Asiyada tərədaş ölkələri arasında nəqliyyat sahəsində beynəlxalq əməkdaşlıq proqramıdır. Təşkilatın Bakıda daimi katibliyi var.
Hazırda TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.