Azərbaycan, Bakı, 22 avqust /Trend, müxbir E.İsmayılov/
Parlament prospektində yeni yeraltı keçidin inşası layihəsi çərçivəsində kommunikasiyaların köçürülməsi üzrə işlərə başlanılıb. Bu barədə bazar ertəsi Trend-ə Azərbaycan Nəqliyyat Nazirliyi "Azəryolservis" QSC-dən məlumat verilib.
QSC-dən deyildiyi kimi, kommunikasiyaların və infrastrukturun köçürülməsi işlərinin həcmi böyükdür və onların həyata keçirilməsi iki ay vaxt aparacaq.
"Tikinti işlərinin başa çatacağı müddət barədə yalnız kommunikasiyaların köçürülməsindən sonra danışmaq olar", - QSC-dən deyiblər.
Mənbənin sözlərinə görə, belə keçidin yaradılması üç çıxışın inşasını nəzərdə tutur. Çıxışlardan biri Milli Məclis binasının yerləşdiyi ərazidə, ikinci çıxış Şəhidlər xiyabanı tərəfdə, üçüncü isə tikilməkdə olan "Flame Tour" yaxınlığında olacaq.