Azərbaycan, Bakı, 21 sentyabr /Trend, müxbir A.Axundov/
Yanvar-avqustda Azərbaycan 70,558 milyon dollar məbləğində kimyəvi məhsullar ixrac edib ki, bu da ümumi ixracın 0,46 faizini təşkil edir və ötən ilin müvafiq dövründəki göstəricidən 2,18 dəfə çoxdur. Bu barədə Dövlət Gömrük Komitəsinin hesabatında deyilir.
İlk səkkiz ay ərzində ixracın böyük hissəsi (86,78 faiz) xam neftin payına düşüb. Yanvar-avqustda 15,444 milyard dollar həcmində xam neft ixrac olunub ki, bu da ötən ilin analoji dövründəki göstəricini 28,13 faiz ötür.
Hesabat dövründə 951,33 milyon dollar məbləğində neft məhsulları ixrac olunub ki, bu da ölkənin ümumi ixracının 5,35 faizini təşkil edib.
İlin ilk səkkiz ayı ərzində qara metal və ondan hazırlanan məmulatların ixracı 143,33 milyon dollar məbləğində (artım 86,08 faiz, ümumi ixracda payı 0,81 faiz), 6,06 milyon dollar məbləğində tütün və tütün məmulatları (61,09 faiz artım, ümumi ixracda payı 0,03 faiz), 3,3 milyon dollarlıq aluminum və ondan hazırlanan məmulatlar (78,67 faiz artım, ümumi ixracda payı 0,02 faiz), 101,44 milyon dollarlıq meyvə-tərəvəz (artım 67,54 faiz, ümumi ixracda payı 0,57 faiz); 9,25 milyon dollarlıq alkoqollu və alkoqolsuz içkilər (azalma 5,19 faiz, ümumi ixracda payı - 0,57 faiz); 129,68 milyon dollarlıq bitki və heyvan mənşəli yağlar (azalma 6,31 faiz, ümumi ixracda payı - 0,73 faiz) ixrac olunub.
İlin ilk səkkiz ayı ərzində ixrac əməliyyatları 17,798 milyard dollar təşkil edib ki, bu da 2010-cu ilin analoji dövrü ilə müqayisədə 27,59 faiz çoxdur.
Yanvar-avqustda Azərbaycanın idxalı 5,863 milyard dollar təşkil edib ki, bu da 2010-cu ilin analoji dövrü ilə müqayisədə 45,76 faiz çoxdur.
Xarici ticarət əməliyyatlarında 11,935 milyard dollar həcmində müsbət saldo yaranıb.
Ölkədə mal dövriyyəsinin ümumi həcmi 23,661 milyard dollar təşkil edib. Bu, 2010-cu ilin analoji dövrü ilə müqayisədə 31,66 faiz çoxdur.
