Azərbaycan, Bakı, 28 sentyabr /Trend, müxbir E.İsmayılov/
Oktyabrın ortalarında Bakıda Azərbaycan və Rusiyanın ekspertləri "İnvestisiyaların qarşılıqlı təşviqi və qorunması haqqında" hökumətlərarası saziş layihəsi çərçivəsində məsələləri müzakirə edəcəklər. Trend-in məlumatına görə, bu barədə Rusiyanın Azərbaycandakı ticarət nümayəndəsi Yuri Şedrin Bakıda çərşənbə günü jurnalistlərə bildirib.
Onun sözlərinə görə, hökumətlərarası sazişin hazırlanması prosesi danışıqlar mərhələsindədir. Görüş Bakıda Azərbaycan tərəfinin təşəbbüsü ilə keçirilir. Bu məsələ ilə bağlı sonuncu görüş ötən ilin dekabrında Moskvada baş tutub.
Şedrinin sözlərinə görə, iki ölkənin hökumətləri sazişin fəaliyyət müddəti üzrə məsələdə kompromisə nail ola bilmirlər.
Azərbaycan təklif edir ki, o, Azərbaycan və Rusiya əməkdaşlığının bütün tarixinə şamil edilsin, Rusiya tərəfi isə 1992-ci ildən başlayan dövrü əhatə etməsində israr edir.
Bu sazişin imzalanması böyük əhəmiyyətə malikdir, çünki hazırda Rusiya iqtisadiyyatına qoyulan Azərbaycan sərmayələri ilə ətraflı tanışlıq gedir, həmçinin Azərbaycanda rusiyalı investorların sərmayələri də artır.
Proqnozlara görə, bu ilin yekunları üzrə Azərbaycanla və Rusiya arasında mal dövriyyəsinin həcmi 2,8-3 milyard dollar səviyyəsinə çatacaq.
