Azərbaycan, Bakı, 24 oktyabr /Trend, müxbir A.Axundov/
Azərbaycanda ünvanlı sosial yardımların (ÜSY) məbləğinin müəyyən edilməsi üçün ehtiyac meyarının səviyyəsi hazırkı 75 manatdan 2012-ci ildə 84 manata çatdırılacaq. Trend-in məlumatına görə, bu barədə baxılmaq üçün Milli Məclisə təqdim olunmuş 2012-ci və sonrakı üç il üzrə dövlət büdcəsi layihəsində deyilir.
2013-cü ildə bu göstərici 92 manata, 2014-cü ildə 100 manata, 2015-ci ildə 106 manatadək çatdırılacaq.
Gələn il ölkədə yaşayış minimumu hazırkı 95 manatdan 108 manatadək, o cümlədən əmək qabiliyyətli əhali üçün 102 manatdan 116 manatadək, pensiyaçılar üçün 72 manatdan 84 manatadək və uşaqlar üçün 76 manatdan 87 manatadək artırılacaq.
2013-cü ildə Azərbaycanda yaşayış minimumunun səviyyəsi 120,2 manata, 2014-cü ildə 127,7 manata, 2015-ci ildə isə 135,1 manatadək artırılacaq.
Bununla yanaşı, 2013-cü ildə əmək qabiliyyətli əhali üçün yaşayış minimumunun 130 manata, 2014-cü ildə 138 manata, 2015-cü ildə 146 manatadək, pensiyaçılar üçün 2013-cü ildə 101 manata, 2014-cü ildə 107 manata, 2015-cü ildə 114 manata, uşaqlar üçün 2013-cü ildə 99 manata, 2014-cü ildə 106 manata, 2015-cü ildə 112 manatadək artırılacağı proqnozlaşdırılır.
Proqnozlara görə, 2012-ci ildə minimum əməkhaqqı 2010-cu və 2011-ci ildəki 85 manat səviyyəsindən 93,5 manatadək artırılacaq. 2013-cü ildə bu göstərici 120,2 manatadək, 2014-cü ildə 127,7 manatadək, 2015-ci ildə 140 manatadək artırılacaq.
Layihəyə görə, sosial müavinətlərin minimum məbləği 10 manat təşkil edəcək və hər il beş manat artaraq 2015-ci ildə 25 manat olacaq. Ötən il olduğu kimi, cari ildə də sosial müavinətlərin minimum məbləği 5 manat təşkil edəcək.
2015-ci ilədək doktorantlar, tələbələr və şagirdlər üçün təqaüdlərin minimum məbləğində dəyişiklik gözlənilmir. Yaxın dörd il ərzində 30 manat səviyyəsində saxlanacaq.
Oktyabrın 24-nə olan rəsmi məzənnə 0,7869 AZN/USD təşkil edir.
