Azərbaycan, Bakı, 4 noyabr /Trend, müxbir E.İsmayılov/
Koreyanın "Dongsung Engineering" şirkəti bu ilin sonuna qədər Azərbaycan Nəqliyyat Nazirliyinə Bakı buxtası üzərindən körpünün layihəsinin işlənib hazırlanmış texniki-iqtisadi əsaslandırılmasını (TİƏ) təqdim edəcək. Bu barədə cümə günü Trend-ə Nəqliyyat Nazirliyinin Nəqliyyat siyasəti və iqtisadiyyatı şöbəsinin müdiri Sədrəddin Məmmədov deyib.
Onun sözlərinə görə, layihənin TİƏ-si artıq nazirliyə təqdim edilib. Nazirlik isə öz növbəsində, öz qərarını və təklifini hazırlayıb.
"Hazırda Koreya tərəfi bu təkliflər üzərində işləyir və ilin sonuna qədər onlar işlənmiş variantı təqdim edəcəklər", - Məmmədov bildirib.
İlkin məlumatlara əsasən, körpünün tikintisi 1,8 milyard dollara başa gələ bilər.
Koreya mütəxəssisləri tərəfindən hazırlanan layihə qəbul ediləcəyi təqdirdə, "building-operation-transfer" prinsipi ilə işləyəcək beynəlxalq konsorsium yaradılacaq. Bu da konsorsium tərəfindən körpünün işlənməsi, layihələşdirilməsi, tikintisi və istismara verilməsində investisiyaların qoyulmasını nəzərdə tutur.
Yeni körpü ona qoyulan vəsaitləri çıxartdıqdan sonra konsorsium körpünü Azərbaycana təhvil verəcək. Azərbaycan tərəfdən bu layihəyə vəsait qoyuluşu nəzərdə tutulmayıb.