Azərbaycan, Bakı, 13 fevral /Trend, müxbir A.Axundov/
Azərbaycanın "Atəşgah" sığorta şirkəti 2011-ci ildə əməliyyat gəlirlərini 36,5 faiz artırıb. Bu barədə bazar ertəsi Trend-ə şirkətdən məlumat veriblər.
"Şirkətin 2011-ci il ərzində əsas əməliyyat gəlirləri və xərcləri, müvafiq olaraq, təxminən 18,7 milyon manat və 11,7 milyon manat təşkil edib", - şirkətdən bildiriblər.
2010-cu ilin yekunları üzrə şirkətin əməliyyat gəlirləri 13,7 milyon manat, xərcləri isə 9,5 milyon manat təşkil edib. Şirkətin ümumi gəlirləri 16,734 milyon manat, xərcləri isə 16,327 milyon manat olub.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına əsasən, şirkət 2011-ci ildə sığorta mükafatlarının həcmi üzrə 18,547 milyon manatla bazarda dördüncü olub.
Digər tərəfdən, 2010-cu illə müqayisədə şirkətin yığımları 26,68 faiz artıb, ödənişləri isə 17,87 faiz çoxalaraq 6,2 milyon manata çatıb.
"Sığorta şirkətinin texniki əməliyyatlar üzrə nəticəsi bazarın lideri olan şirkətlər arasında ən yüksəklərdən biridir. 2011-ci il ərzində gəlirlər auditor yoxlamasından sonra 2012-ci ilin martına qədər dəqiqləşdiriləcək", - şirkətdən deyiblər.
2010-cu ilin yekunları üzrə şirkətin xalis gəliri 0,407 milyon manat olub.
Şirkətdən qeyd ediblər ki, hazırda kapitalın artırılması nəzərdə tutulmur, belə ki, şirkətin ümumi kapitalı normativ tələblərə cavab verir.
2010-cu ilin nəticələrinə əsasən, şirkətin ümumi kapitalı 2009-cu illə müqayisədə 4,83 faiz artaraq 7,067 milyon manat təşkil edib. Ödənilən nizamnamə kapitalı hazırda 3,699 milyon manatdır.
"Atəşgah" sığorta şirkəti 1996-cı ilin sonunda təsis edilib və "Atəşgah" Sığorta Qrupuna daxildir. Şirkət müştərilərinə 20-dən çox sığorta növü üzrə xidmət göstərir.
Fevralın 13-nə olan rəsmi məzənnə 0,7863 AZN/USD təşkil edir.