Azərbaycan, Bakı, 11 aprel /Trend, müxbir Ə.Həsənov/
Ukrayna "Vikinq" dəmiryol layihəsi çərçivəsində Azərbaycanın Qara-Baltik dənizi nəqliyyat dəhlizinə qoşulmasında maraqlıdır. Trend-in məlumatına görə, bu barədə çərşənbə günü jurnalistlərə Ukraynanın Azərbaycandakı səfiri Aleksandr Mişenko bildirib.
"Bu, çox sərfəli layihədir. Layihə yüklərin nəqli üçün bütün bürokratik əngəlləri azaltmaq imkanı verir. Biz ümid edirik ki, Azərbaycan bu layihəyə qoşulacaq", - Mişenko deyib.
Onun sözlərinə görə, hazırda Azərbaycan-Ukrayna hökumətlərarası komissiyanın iclasının gündəliyi hazırlanır. "İclasda nəqliyyat məsələləri də müzakirə ediləcək. Biz iclas zamanı mövcud layihə üzrə cavab almağa ümid edirik", - səfir qeyd edib.
Qeyd edək ki, "Vikinq" layihəsi 2008-ci ilin mayında işə salınıb.
