Azərbaycan, Bakı, 8 may /Trend, müxbir Ə.Həsənov/
Azərbaycan Əmlak Məsələləri Dövlət Komitəsi Salyan şəhərində Mərkəzi İdman Kompleksinin satın alınması üzrə investisiya müsabiqəsi elan edib. Trend-in məlumatına görə, bu barədə çərşənbə axşamı komitənin "Mülkiyyət" qəzetində deyilir.
Müsabiqədə Azərbaycanın fiziki və hüquqi şəxsləri, o cümlədən xarici investorlar iştirak edə bilərlər. Namizədlər obyektin səmərəli istifadəsi ilə bağlı təkliflərlə birlikdə investisiya proqramını təqdim etməlidirlər.
Namizədlər, həmçinin investisiya təklifinin 5 faizi dəyərində bank zəmanətini və dövlət büdcəsinə 100 min manat daxil edilməsi ilə bağlı təklif təqdim etməlidirlər.
İdman kompleksinin satın alınmasının başlanğıc qiyməti 109 595 manat təşkil edir.
Namizədlər 2012-ci il 18 iyun saat 10:00-dan 17:30-dək Bakı ş., Y. Səfərov 20 ünvanında Əmlak Məsələləri Dövlət Komitəsindəki 810-cu otaqda müsabiqənin tələbləri, özəlləşdirmə planı ilə tanış ola və əlavə məlumat ala bilərlər.
Sənədlər və təkliflər 18 iyun saat 10:00-dan 17:30-dək qəbul edilir. Əlaqə nömrəsi (012) 490 2408 (daxili 242).
