Azərbaycan, Bakı, 12 sentyabr /Trend, müxbir A.Axundov/
Azərbaycanda kənd təsərrüfatı işləri üçün bələdiyyə torpaqlarının icarəyə verilməsi prosedurları sadələşdiriləcək.
Trend-in məlumatına görə, Mili Məclisin Regional məsələlər komitəsinin çərşənbə günü keçirilən iclasında komitə sədri Arif Rəhimzadə bildirib ki, bu məsələ komitənin payız sessiyasının iş planına daxil edilib.
"Bu məsələ bələdiyyələrin özləri tərəfindən qaldırılıb. Onlar torpaqların bir ildən az müddətə icarəyə verilməsi zamanı çətinlik çəkirlər. Mürəkkəb prosedurlar bu məsələ ilə bağlı qərar qəbul etmə prosesini ləngidir", - Rəhimzadə bildirib.
Komitə payız sessiyasında ölkənin Torpaq Məcəlləsinə dəyişikliklər edilməsi barədə qanun layihəsinə baxacaq. Dəyişikliklər torpaqların yalnız bələdiyyələrin qərarı əsasında 11 aydan az müddətə icarəyə, yəni indi olduğu kimi başqa strukturların iştirakı olmadan verilməsini nəzərdə tutur.
"11 ay mövsümi işlərin görülməsi üçün maksimum müddətdir. Bugünkü şəraitdə torpaqların qısa müddətə icarəyə verilməsi ilə bağlı qərar qəbul edilməsinə dair prosedurların özü icarə dövründən daha çox vaxt aparır", - Rəhimzadə deyib.
Onun sözlərinə görə, bundan başqa, bələdiyyələr müraciətlərə və vətəndaşların şikayətlərinə baxılması müddətini indiki beş gündən 15-30 günədək uzadılmasını təklif edir.
