Azərbaycan, Bakı, 22 yanvar /Trend, müxbir A.Axundov/
Vergilər Nazirliyi bu il vergiödəyicilərlə tərəfdaşlıq sazişləri bağlamağa başlayacaq ki, bu da Vergi Məcəlləsinə dəyişikliklərin qüvvəyə minməsindən sonra mümkün olub. Trend-in məlumatına görə, bu barədə çərşənbə axşamı vergilər nazirinin birinci müavini Natiq Əmirov mətbuat konfransında bildirib.
"Məsələn, əgər mağaza sahibi POS-terminaldan istifadə etməyi, bütün əməliyyatlar üzrə çek vurmağı, vergiləri vaxtında ödəməyi öhdəsinə götürəcəksə, nazirlik onunla saziş imzalayır. Sazişin bəndlərindən biri odur ki, nazirlik vergiödəyici bu öhdəliklərə riayət edənədək həmin mağazada yoxlamalar aparmayacaq. Belə sazişləri digər sahələrdə, məsələn, vergi bəyannamələrinin, vergi uçotlarının və s. təqdim edilməsində də bağlamaq olar", - Əmirov qeyd edib.
Onun sözlərinə görə, belə sazişin imzalanması vergiödəyicinin öhdəliyi deyil, hüququdur.
"Bu, vergiödəyicilər və nazirlik arasında əməkdaşlığın yeni formatıdır. Məqsəd vergiödəyicilərin risklərini minimuma endirməkdir", - nazir müavini deyib.