Azərbaycan, Bakı, 6 fevral /Trend, müxbir A.Axundov/
Azərbaycanda gəlir vergisi üzrə güzəşt və imtiyazlar bu il vergi ödəyicilərinin və vətəndaşların sərəncamında əlavə 47 milyon manat qalmasına imkan yaradacaq.
Trend-in məlumatına görə, bu barədə çərşənbə günü Vergilər Nazirliyinin Vergi siyasəti və strateji araşdırmalar baş idarəsinin rəisi Akif Musayev rəsmi mətbuatda dərc edilən müsahibəsində bildirib.
Vergi Məcəlləsinə edilən dəyişikliklərə əsasən, bu ildən fiziki şəxslərin gəlir vergisinin maksimal dərəcəsi 30 faizdən 25 faizə endirilib, aylıq və illik gəlirlərin 14 faiz dərəcə ilə vergiyə cəlb edilən məbləğləri, müvafiq olaraq, 2000 manatdan 2500 manatadək və 24000 manatdan 30000 manatadək qaldırılıb. Bununla yanaşı, gəlir vergisi üzrə güzəştlərin həcmi də genişləndirilib.
"Güzəşt və imtiyazların həcminin genişləndirilməsi nəticəsində təkcə bu il əlavə olaraq 47 milyon manatdan artıq vəsaitin vergi ödəyicilərinin və vətəndaşlarının sərəncamında qalacağı gözlənilir. Bu vəsait sahibkarlıq fəaliyyətinin genişləndirilməsi, vətəndaşların sosial və digər problemlərinin həlli üçün kifayət qədər əhəmiyyətli dəstək olacaq", - Musayev deyib.