Azərbaycan, Bakı, 9 yanvar / Trend, müxbir A.Axundov /
2013-cü ildə Azərbaycanda avtonəqliyyat vasitələri sahiblərinin məsuliyyətinin icbari sığortası üzrə 16,8 min sığorta hadisəsi qeydə alınıb. Trend xəbər verir ki, bu barədə İcbari Sığorta Bürosunun (İSB) məlumatında deyilir.
Məlumata görə, sığorta hadisələrinin 78,9 faizi Bakıda və Abşeron yarımadasının ərazisində, 3,42 faizi Sumqayıtda, 2,09 faizi Gəncədə, 1,15 faizi Şəkidə, 1,03 faizi Bərdədə və s. qeydə alınıb.
Avtonəqliyyat vasitələri sahiblərinin məsuliyyətinin icbari sığortası üzrə çalışmaq hüququna yalnız İSB iştirakçıları malikdirlər. Bunlar 12 şirkətdir: Paşa Sığorta, Atəşgah Sığorta Şirkəti, Standard Insurance Sığorta Şirkəti, AtaSığorta, Xalq Sığorta, AXA MBASK Sığorta Şirkəti, Azsığorta, Alfa Sığorta, "Azərsığorta" Dövlət kommersiya sığorta şirkəti, Meqa Sığorta, İpək Yolu Sığorta və Azərbaycan Sənaye Sığorta.
2013-cü ildə bu şirkətlər avtonəqliyyat vasitələri sahiblərinin məsuliyyətinin icbari sığortası üzrə 18477 tələbə görə 25,3 milyon manat həcmində ödəmə həyata keçiriblər.
