Azərbaycan, Bakı, 30 yanvar /Trend, müxbir A.Axundov/
"Başak İnam Sığorta" Azərbaycan-Türkiyə sığorta şirkəti 2014-cü ildə 6-7 milyon manat həcmində sığorta yığımı toplamağı planlaşdırır. Bunu cümə axşamı Trend-ə şirkətin İdarə heyətinin sədri Orxan Həsənov deyib.
Onun sözlərinə görə, kənd təsərrüfatı sığortası şirkətin fəaliyyətində prioritet istiqamət olaraq qalacaq: "Hazırda şirkətin portfelinin böyük hissəsini könüllü avtomobil sığortası, əmlak sığortası növləri formalaşdırır. Bənzər vəziyyət 2014-cü ildə də müşahidə ediləcək".
Qeyd edək ki, Dövlət Sığorta Nəzarəti Xidmətinin məlumatına görə, ötən il şirkətin yığımları 4,14 milyon manat, ödənişləri isə 1,78 milyon manat olub. Şirkət yığımların həcminə görə 21-ci (Azərbaycanda 28 sığorta şirkəti fəaliyyət göstərir), ödənişlər üzrə isə 17-ci yeri tutur.