Azərbaycan, Bakı, 11 aprel /Trend, müxbir E.Əliyev/
Qiymətli Kağızlar üzrə Dövlət Komitəsi tərəfindən "TBC Bank olmayan Kredit Təşkilatı" MMC-nin 3 milyon manat məbləğində təmin edilməmiş, faizli, adlı, sənədsiz istiqrazlarının emissiya prospekti qeydə alınıb. Trend-in məlumatına görə, bu barədə Bakı Fond Birjasının (BFB) yaydığı xəbərdə deyilir.
Emissiya çərçivəsində hər birinin nominal dəyəri min manat olan 3 min istiqraz buraxılıb. Qiymətli kağızların tədavül müddəti illik 9 faiz gəlirliliklə 2 il, faizlərin ödəmə müddəti isə rübdə bir dəfədir.
Yerləşdirmənin anderrayteri qismində "ADB Broker" çıxış edib.
BFB-nin üzvü olan və broker lisenziyasına malik şəxslər istiqrazları əldə etmək üçün təşkilata müraciət edə bilərlər.
"TBC Kredit" Azərbaycanda 1999-cu ildən etibarən fəaliyyət göstərir. 2007-ci ilin dekabrından etibarən təşkilatın 75%-i Gürcüstanın aparıcı bankı "TBC Bank"a, 25%-i isə "ShoreBank International Ltd"-yə məxsusdur.