Azərbaycan, Bakı, 5 sentyabr /Trend, müxbir Zülfiyyə Qurbanova/
2014-cü ilin iyul ayında Azərbaycan Mərkəzi Bankı (AMB) yanında Mərkəzləşdirilmiş Kredit Reyestri Xidmətinə 284 945 müraciət daxil olub. Trend-in məlumatına görə, bu barədə Mərkəzi Bankın 2014-cü ilin ilk 7 ayının nəticələri üzrə statistik hesabatında deyilir.
2013-cü ilin müvafiq dövrünüm göstəricisi (203 688) ilə müqayisədə Xidmətə müraciətlər 39,9 faiz artıb.
İyulda banklardan kredit reyestrinə 275 740 sorğu (il ərzində artım 35,7 faiz) daxil olub, 9205 nəfər (18 dəfə artım) öz kredit tarixçəsi barədə məlumat almaq məqsədilə müraciət edib.
İyul ayının sonuna olan məlumata görə, kredit reyestrində haqqında məlumat olan borcalanların sayı 2 164 493, kredit məlumatlarının ümumi sayı isə 7 918 794 təşkil edir.
Borc götürənlərin ümumi sayından 10 533-ü hüquqi şəxs, 2 135 492-si fiziki şəxs, 18 468-i isə sahibkarlıq subyektidir. Borc götürənlər arasında fiziki şəxslərin sayında artım (21,9 faiz) müşahidə olunur. Kredit reyestrində hüquqi şəxslər haqqında məlumatlar 10,4 faiz, sahibkarlar üzrə isə 16,5 faiz artıb.
Reyestrdə olan zaminlər haqqında məlumatların sayı 1 011 787-dir.
Qeyd edək ki, Mərkəzləşdirilmiş Kredit Reyestri Xidməti 2005-ci ilin mart ayından fəaliyyət göstərir.
