Azərbaycan, Bakı, 10 sentyabr /Trend, müxbir Zülfiyyə Qurbanova/
2014-cü ilin sonuna Azərbaycanın avtomobil sığortası bazarının göstəriciləri ötənilki səviyyəyə çata bilməyəcək. Bu barədə Trend-ə "Başak İnam Sığorta" şirkətinin İdarə Heyətinin sədri Orxan Həsənov bildirib.
Maliyyə Nazirliyi yanında Dövlət Sığorta Nəzarəti Xidmətinin statistikasına görə, ölkənin sığorta bazarının tempi ötən illə müqayisədə azalıb, buna səbəb isə avtomobil kreditlərinin verilməsi şərtlərinin sərtləşdirilməsi, aprelin 1-dən Avro-4 ekoloji standartına keçidlə əlaqədar nəqliyyat vasitələrinin idxalının azalması, eləcə də texniki baxışdan keçmə müddətində dəyişiklikdir.
O.Həsənovun fikrincə, gələn il də avtomobil sığortası bazarının göstəriciləri yüksək olmayacaq: "Bütün sığorta şirkətlərində avtomobil sığortası prinsip etibarilə bank kreditlərinə bağlıdır. Hazırkı vəziyyəti nəzərə alaraq, ilin sonuna kimi sığortanın bu növü üzrə göstəricilərin heç olmasa ötənilki səviyyədə olacağını düşünmürəm".
Şirkət rəhbəri qeyd edib ki, avtomobil sığortası bazarı iştirakçılarının təqribən 50-60 faizi natamam sığorta paketi alan bank müştəriləridir ki, nəticədə ümumilikdə onların təxminən 40 faizi sığorta xidmətlərindən narazı qalır [sığorta hadisəsi baş verən zaman ödənişlərin aşağı həcmdə olması səbəbindən].
O.Həsənov əlavə edib ki, belə vəziyyətdə hansısa inkişafdan söhbət gedə bilməz.
