Azərbaycan, Bakı, 10 sentyabr /Trend, müxbir Zülfiyyə Qurbanova/
Azərbaycan-Türkiyə sığorta şirkəti "Başak İnam Sığorta" İcbari Sığorta Bürosuna (İSB) daxil olmaq planlarından imtina edib. Bunu çərşənbə günü Trend-ə şirkətin İdarə Heyətinin sədri Orxan Həsənov deyib.
Onun sözlərinə görə, şirkət uzun illərdir İSB-yə qoşulmağa çalışıb: "Lakin hazırda bu məsələ planlarımıza daxil deyil. Bazarda artıq kifayət qədər oyunçu var və yeni oyunçu qismində İSB-nin sıralarına daxil olmaq qeyri-realdır".
Qeyd edək ki, 15 şirkət İSB-nin iştirakçısıdır.
O. Həsənov əlavə edib ki, şirkət 2014-cü ildə sığorta haqlarının həcmini ötən ildə olduğu kimi təqribən 4 milyon manat səviyyəsində saxlamağı planlaşdırır.
Onun sözlərinə görə, şirkət ilin əvvəlindən təqribən 2,5 milyon manat sığorta haqqı toplayıb.
Xatırladaq ki, "Başak İnam Sığorta" şirkəti 1996-cı ildən ölkənin sığorta bazarında fəaliyyət göstərir.