...

Sanksiyalar ləğv olunsa belə, İran Çinlə ticarət əlaqələrini davam etdirəcək

Biznes və iqtisadiyyat xəbərləri Materials 13 Noyabr 2014 16:03 (UTC +04:00)

Azərbaycan, Bakı, 13 noyabr /Trend, müxbir Təmkin Cəfərov/

Çin həmişə İranla yaxşı münasibətdə olub və biz gələcəkdə İrana qarşı sanskiyalar ləğv olunsa belə, Çinlə konstruktiv əlaqələrimizi davam etdirmək niyyətindəyik. Bunu bu gün Trend-ə eksklüziv açıqlamasında İran İslam Respublikasının iqtisadiyyat və maliyyə naziri Əli Təyyibniya deyib.

Ə.Təyyibniya bildirib ki, İranın Çin və Hindistanla ticarət mübadiləsinin həcmi əhəmiyyətli dərəcədə çoxdur: "Ölkəmizin ticarət mübadiləsinin çox hissəsi bu iki ölkə ilə aparılır. Xüsusilə Çinlə ticarət dövriyyəmiz çoxdur".

Onun sözlərinə görə, Çin və Hindistanın İrana sərmayə yatırmaq sahəsində də payı çoxdur: "Ən az 20 milyard dollar dəyərində layihələr var ki, təsdiqlənib və icra olunma ərəfəsindədir. Ümid edirik ki, yatırılan sərmayələrin həcmi gələcəkdə bir neçə dəfə artacaq".

"Avropa ölkələrinin İrana sərmayə yatırması Çinlə əlaqələrin azalması ilə nəticələnəcəkmi" sualına cavabında nazir qeyd edib ki, İran bütün ölkələrlə onların iqtisadi güclərinə uyğun ticarət əlaqələri qurmağa çalışır: Bizim üçün hər hansı ölkə ilə əməkdaşlıqda məhdudiyyət yoxdur. İranın digər ölkələrlə ticarət əlaqələri üzrə siyasəti müxtəliflik yaratmaqdır. Bizim Çinlə ticarət əlaqələrimizin olması Qərb ölkələri ilə ticarət əlaqələrinə mane olmur".

Qeyd edək ki, Çin İranın ən böyük iqtisadi tərəfdaşıdır. Son 7 ayda (İranda il martın 21-də dəyişir) İran Çinə 5,17 milyard dollarlıq qeyri-neft məhsulları ixrac edib ki, ötən ilin eyni dövrü ilə müqayisədə bu göstərici 29,17 faiz çoxdur. Çinin İrana ixracatı isə 7 milyard dollar təşkil edib ki, keçən ilin müvaviq dövrü ilə müqayisədə bu göstərici 54 faiz artıb.

Məqalədə:
Xəbər lenti

Xəbər lenti