Moskvada keçirilməli olan Azərbaycanda aqrar islahatların 10 illiyinə həsr olunmuş elmi-təcrübi konfransın tarixi qeyri-müəyyən vaxta təyin olunub. Kənd Təsərrüfatı Nazirliyindən Trend ə bildirildiyi kimi, əvvəlcə tədbir 2005-ci ilin iyul ayında keçirilməli olsa da, daha sonra onun tarixi sentyabra təyin olunmuşdu.
Dövlət strukturunda o da qeyd olunub ki, bunun səbəbi konfransın təşkilatçısı olan Rusiya tərəfinin müvafiq müraciətilə əlaqədardır.
Tədbirin Rusiya Federasiyasının Kənd Təsərrüfatı Nazirliyində keçirilməsi planlaşdırılır.
Konfransın keçirilməsində məqsəd son 10 il ərzində Azərbaycanın aqrar sektorunda əldə olunmuş nailiyyətlərin müzakirəsindən ibarətdir (Azərbaycanın aqrar sektorunda birinci islahat 1995-ci ilin fevralında aparılıb).
Konfrans Rusiyada 2005-ci ilin Azərbaycan ili elan olunması ilə bağlı tədbirlər çərçivəsində keçiriləcək.
Rusiyada 2005-ci ilin Azərbaycan ili elan olunmasına dair qərar 2004-cü ilin aprelində Azərbaycan-Rusiya hökumətlərarası iqtisadi əməkdaşlıq komissiyasının 8-ci iclasının protokolu ilə qəbul edilib.
