2006-cı ildə Bakı və Sumqayıtda məcburi köçkünlərin müvəqqəti yerləşdiyi təxminən 200 yataqxananın əsaslı təmir olunması planlaşdırılır. Bu barədə Trend ə Azərbaycanın Nazirlər Kabinetinin qaçqınlar və məcburi köçkünlərin problemləri, miqrasiya və beynəlxalq təşkilatlarla iş üzrə şöbənin müdiri Qurban Sadıqov bildirib.
Onun sözlərinə görə, yataqxanaların təmiri Azərbaycan qaçqın və məcburi köçkünlərin sosial həyat səviyyəsinin yaxşılaşdırılması Dövlət proqramına əsasən həyata keçirilir. Q.Sadıqov bildirib ki, proqram çərçivəsində bu il Bakı və Sumqayıtda 68 yataqxananın təmiri nəzərdə tutulur.Yataqxanaların böyük qismi təmir edilib, qalan yataqxanalarda isə iş ilin sonunadək başa çatdırılacaq. Şöbə müdiri bildirib ki, bütövlükdə, Azərbaycanda məcburi köçkünlərin müvəqqəti yerləşdiyi 600 belə bina təmir edilməlidir. Hökumət beynəlxalq humanitar təşkilatları, donor ölkələri və QHT-ni bu işə cəlb etməyi planlaşdırır.
Q.Sadıqov xatırladıb ki, qaçqın və məcburi köçkünlərin həyat səviyyəsinin yaxşılaşdırılmasına dair proqram 2005-ci ildə təsdiq edilib. Proqram onların sosial-iqtisadi həyatı ilə bağlı olan problemlərin həllini, zəruri infrastrukturun yaradılmasını nəzərdə tutur.
