Azərbaycan dövlət sektorunun Avropa Yenidənqurma və İnkişaf bankından (AYİB) aldığı kreditlərin ümumi həcmi təxminən $270 mln təşkil edir. Özəl sektorda bu həcm $500 mln-a bərabərdir. Trend in xəbər verdiyi kimi, bu barədə iqtisadi inkişaf nazirinin müavini Mikayıl Cabbarov məlumat verib.
Onun sözlərinə görə, neft layihələrinin həyata keçirilməsindən xeyli vəsait əldə edildikdən sonra Azərbaycan ölkə ərazisində fərdi maliyyələşdirmə siyasətinə başlayır. "Buna görə də gələcəkdə AYİB-dən alınacaq kreditlərin əsas həcmi özəl sektora yönəldiləcək. Bu halda kreditin ayrılması şərtləri bu sektor üçün cəlbedici olmalıdır", - deyə o qeyd edib.
Vəsaitlərin cəlb olunmasının azalmasına baxmayaraq Azərbaycan hökuməti beynəlxalq maliyyə institutları ilə əməkdaşlığı davam etdirmək niyyətindədir. Bu, əsasən dövlət müəssisələrində struktur islahatlar və onların işinin təkmilləşdirilməsi məsələlərinə aiddir.