Asiya İnkişaf Bankının (AİB) Bakı nümayəndəliyinin ofisində bankın Azərbaycanda "quş qripi" təhlükəsinin aradan qaldırılması üçün $50 min həcmində qrant vəsaiti ilə alınmış müdafiə avadanlığı və ləvazimatın təhvil-təsliminə dair sənəd imzalanıb. Trend bildirir ki, təhvil-təslim mərasimində nümayəndəliyin rəhbəri Metyu Vestfol və Dövlət baytarlıq xidmətinin direktoru Emin Şahbazov iştirak edib.
M.Vestfol bildirib ki, bunlar rayon Baytarlıq xidməti mərkəzlərinin nəzarət və xəstəliyin qarşısının alınması üzrə fəaliyyətə cəlb edilmiş işçiləri arasında bölüşdürüləcək.
AİB-in yardımı çərçivəsində kənd təsərrüfatı Nazirliyinə 6000 müdafiə geyimi, N95 respiratorları, əlcəklər və 500 ədəd müdafiə eynəyi təqdim edib.
Bu, birbaşa yardım strategiyası və fəaliyyət planı məqsədilə Azərbaycan hökumətinə təqdim edilən qrant yardımının ilk mərhələsidir. Nümayəndəliyin rəhbəri qeyd edib ki, bank fövqəladə vəziyyəti nəzərə alaraq daha uzunmüddətli qrant yardımı göstərməyi planlaşdırır.
E.Şahbazov "quş qripi" ilə mübarizə çərçivəsində keçirilən tədbirlər barədə danışıb. "Azərbaycanın sərhədlərində güclü nəzarət rejiminə keçilib, iri broyler fabriklərində bütün tədbirlər görülüb, amma köçəri quşların miqrasiyasının qarşısının alınması mümkün olmayıb. Bu, bizdən asılı deyil" -deyə E.Şahbazov qeyd edib.
