Bir ay ərzində Beynəlxalq Maliyyə Korporasiyası Azərbaycanda və Mərkəzi Asiya ölkələrində lizinqin inkişaf proqramı üçün nəzərdə tutulmuş xüsusi fond hesabına AG Leasinq-in maliyyələşdirilməsinə dair qərar qəbul edəcək. Bu barədə Trend ə layihənin rəhbəri Elçin Əhmədov məlumat verib.
Proqramın ümumi büdcəsi $30 mln təşkil edir, bu məbləğin $5 mln-u hələlik UniBank üçün ayrılıb. Hazırda korporasiya tərəfindən AG Leasing və Bank of Baku-nun ərizələrinə baxılır.
Proqram üçün nəzərdə tutulmuş vəsaitdən Azərbaycan və Qazaxıstan bankları üçün $15 mln məbləğində iki kredit ayrılıb. Üçüncü kredit də lizinq şirkətinin həmtəsisçisi olan Azəriqazbank üçün ayrılacaq.
Kiçik və orta biznesin, o cümlədən lizinqin inkişafı məqsədilə Azəriqazbank üçün kredit iki xətdə ayrılacaq. BMK-nın şərtlərinə görə, kreditin həcmi bankların nizamnamə kapitalının 50%-ni keçməməlidir.
