İndiki zamanda "Alternativ hərbi hazırlıq haqqında" qanun layihəsinin qəbul edilməsinin tərəfdarı deyiləm. Bu barədə Trend ə Milli Məclisin müdafiə və təhlükəsizlik məsələləri daimi komissiyası sədrinin müavini, hakim Yeni Azərbaycan Partiyası Siyasi Şurasının üzvü, politoloq Aydın Mirzəzadə bildirib.
Qeyd edək ki, Avropa Şurası tərəfindən Azərbaycanın qarşısına qoyulan öhdəliklərdən biri də bu qanunun qəbul edilməsidir. Ancaq bu vaxtadək Azərbaycan dövləti adıçəkilən qanunu qəbul etməyib.
Millət vəkili bildirib ki, adıçəkilən qanun layihəsi üzərində iş aparılıb: "Ancaq sənədin parlamentdə geniş müzakirəsi gözlənilmir. Birincisi ona görə ki, Azərbaycan üçün bu tamamilə yeni mexanizmdir. Bu məsələdə digər dövlətlərin təcrübəsi öyrənilməlidir. İkincisi də cəmiyyətdə bu modelə münasibət birmənalı deyil. Ölkənin müharibə vəziyyətində olduğunu nəzərə alaraq kiminsə dini əqidəsinə və yaxud da digər səbəbə görə hərbi xidmətdən uzaqlaşaraq vətən qarşısında borcunu ödəməməsi cəmiyyətdə asanlıqla qəbul edilmir".
A.Mirzəzadə onu da qeyd edib ki, cəmiyyətin əhval-ruhiyyəsini nəzərə alaraq bu sənədin qəbul edilməsinə tələsmək lazım deyil: "Hər halda bu gün Avropa Şurası Azərbaycan tərəfinə ciddi şəkildə tələb qoymayıb ki, bu qanunu təcili qəbul edək. Şəxsən mən bu qanunun indiki zamanda qəbulunun tərəfdarı deyiləm. Bunun üçün zaman yetişməlidir".
