Regional fəaliyyətin inkişafı üçün Milli Depozit Mərkəzi (MDM) İslam İnkişaf Bankı (İİB) ilə danışıqlar aparır. Trend in verdiyi xəbərə görə, bu barədə bu gün mətbuat konfransında mərkəzin prezidenti Bəxtiyar Əzizov bildirib. Onun sözlərinə görə, İİB 200 min ABŞ dolları məbləğində qrant ayırmaq fikrindədir, bu vəsait MDM filialları üçün lazımi avadanlığın, proqram təminatının əldə olunması və kadr hazırlığı üçün nəzərdə tutulub.
Bankın texniki yardımı hesabına mərkəzin Gəncə və Lənkərandakı bölgə filialları təchiz olunacaq.
B.Əzizov hesab edir ki, Quba və Şəkidə filial şəbəkəsinin sonrakı inkişafı üçün də bu qədər vəsait tələb olunur. Onun sözlərinə görə, bu planlar 2006-07-ci illər üçün nəzərdə tutulub. Mərkəzin bütün filialları on-line rejimində işləyəcək və baş serverlə bağlı olacaq.
"MDM-in Naxçıvan filialı haqqında" əsasnamə artıq 1 mart 2006-cı ildən qüvvəyə minib. Bu filial artıq fəaliyyətə başlayıb və ehtimal olunur ki, onun yaradılması ilə Naxçıvan səhmdarlarının qiymətli kağızlarla əməliyyatları asanlaşacaq. Naxçıvanda yaşayan qiymətli kağız sahiblərinin səhmdarlar reyestrindən çıxarış almaq və ya QK ilə digər əməliyyatları həyata keçirmək üçün paytaxta gəlməsinə artıq ehtiyac duyulmayacaq.
