Azərbaycan Nazirlər Kabineti baş nazir Artur Rəsizadənin sədrliyi ilə sentyabrın 25-də keçirdiyi toplantıda 2007-ci il üçün "Dövlət büdcəsi haqqında" qanun layihəsini müzakirə edib. Bu barədə Trend xəbər verir.
Müşavirədə Azərbaycanın maliyyə naziri Samir Şərifov bildirib ki, 2007-ci il büdcəsində ÜDM həcmi 22,2 mlrd. AZN səviyyəsində planlaşdırılıb, onun real artımı 26,3%-dən çox olacaq. Adambaşına düşən ÜDM həcmi 2600 AZN, orta əmək haqqı - 195,1 AZN təşkil edəcək.
Nazirin sözlərinə görə, büdcə proqnozları neftin bir barelinin 50 ABŞ dolları dəyərində olmasını nəzərə almaqla tərtib olunub.
"2007-ci ildə vergi güzəştlərini minimuma endirmək, qeyri-neft sektorunda vergi yığımını artırmaq və ilk dəfə bölgələrdə vergi yığımını artırmaq nəzərdə tutulub və bu, ilk növbədə, son vaxtlar onların sürətli inkişafı ilə bağlıdır", - deyə S.Şərifov bildirib.
2007-ci ildə dövlət büdcəsinin gəliri, 2001-ci illə müqayisədə 6,8 dəfə artacaq və 5 336 mln. AZN və ya ÜDM həcmindən 24%, xərclər isə - 5 715 mln. AZN və ya ÜDM həcmindən 25,7% təşkil edəcək.
2007-ci ildə Azərbaycanın 10 səfirlik və diplomatik nümayəndəliyinin açılması planlaşdırılır və onların fəaliyyətinin təşkili üçün dövlət büdcəsində 7,6 mln. AZN nəzərdə tutulub.