Azərbaycan respublikada gəmi istehsalının yaradılmasına xarici mütəxəssisləri cəlb etməyə hazırdır
Azərbaycanda yeni gəmiqayırma və gəmitəmiri müəssisələrinin inşası layihəsi çərçivəsində Xəzər Dəniz Gəmiçiliyi işə başqa ölkələrdən gəmiqayırma üzrə mütəxəssislər dəvət etmək niyyətindədir. Trend in xəbər verdiyi kimi, bu barədə Azərbaycan Dövlət Xəzər Dəniz Gəmiçiliyinin rəisi Aydın Bəşirov bildirib.
Hal-hazırda bu məsələ ilə bağlı layihə işləri həyata keçirilir. "Bu layihədə Koreya, İsrail, Türkiyə, Yaponiya, Polşa kimi digər ölkələr iştirak etmək istəyirlər", - deyə o bildirib.
Bu, ən müasir müəssisə olacaq. Burada Azərbaycan üçün lazım olan bütün növ gəmilərin inşası həyata keçiriləcək. Zavod 3 mindən 30 min tona qədər yükgötürmə qabiliyyətinə malik gəmilər istehsal edə biləcək.
Onun sözlərinə görə, yeni zavod Bakıdan kənarda yerləşəcək. İlkin yer Qaradağ rayonudur. Elə bu rayonda beynəlxalq ticarət limanının inşası nəzərdə tutulub. A. Bəşirov qeyd edib ki, Zıxda isə kiçik quru yük limanı yaradılacaq. Limanda qida məhsulları və digər bu kimi ekoloji cəhətdən təmiz məhsullarla dolu gəmiləri boşaltmaq üçün 3-4 körpü olacaq.
Müəssisənin ölkədə olan dörd gəmitəmiri zavodunun bazası əsasında yaradılması nəzərdə tutulub. Bu gün bu müəssisələr Bakı buxtasında yerləşir, amma yaxın vaxtlarda buxtada yerləşən müəssisələrin Bakıdan kənara çıxarılması ilə bağlı qərar gözlənilir.
