1 yanvar 1992-ci ildən dəyərdən düşmüş SSRİ Əmanət bankının Azərbaycan şöbəsinə əhalinin qoyduğu əmanətlərin inventarlaşdırılmasının indeksasiyası üzrə Dövlət komissiyası əmanətçilərin nominal uçotunu başa çatdırıb. Trend Kapital Bankın idarə heyətinin sədri Rauf Rzayevə istinadən xəbər verir ki, indeksasiyanın nəticələrinə görə əmanətlərin həcmi 6,5 mlrd. sovet rublu məbləğində müəyyənləşdirilib.
Hazırda komissiyada indeksasiyasının mexanizmləri hazırlanır. Onlardan birində hər min sovet rubluna 111 ABŞ dollarının ödənilməsi nəzərdə tutulub. R.Rzayev bunu indeksasiyanın aparıldığı ölkələr arasında yüksək göstərici olduğunu hesab edir. 15 respublikadan səkkizində indeksasiya elan olunub. MDB ölkələrindən indeksasiya yalnız Qazaxıstan, Qırğızıstan və Belarus Respublikasında başa çatıb. Hazırda əmanətlərin indeksasiyası prosesi Rusiya, Ukrayna və Moldovada gedir. Bu ölkələrdən hər birində o, müxtəlif cür keçir. Belə ki, Rusiyada 1 sovet rublu üçün 0,0033 ABŞ dolları, Qazaxıstanda - 0,006 ABŞ dolları (və ya 150 rubla görə 1 dollar), Ukraynada - 0,009 ABŞ dolları, Belarusiyada - 0,33 ABŞ dolları, Moldovada -0,20 ABŞ dolları, Qırğızıstanda - 0,024 ABŞ dolları nəzərdə tutulub.
Halbuki Azərbaycanın 2006-cı il dövlət büdcəsində indeksasiya üçün 50 mln. yeni manat vəsait nəzərdə tutulub, lakin bu prosesin nə vaxt başlayacağı məlum deyil, çünki hələ bir sıra məsələlər həll edilməyib. R.Rzayevin sözlərinə görə, hər şeydən əvvəl bir sıra qanunverici aktların və Vətəndaş cəmiyyətinin bəzi müddəalarının dəqiqləşdirilməsi tələb olunur.
"Bununla yanaşı, işğal olunmuş ərazilərdən əmanətçilərin sayını dəqiqləşdirmək lazımdır. Bəzi bölgələrdə (hər şeydən əvvəl Dağlıq Qarabağda) yalnız 1 yanvar 1988-ci ilə qədər dürüst statistika var, bu isə real həcmin qiymətləndirilməsini və 1 yanvar 1992-ci ilə qədərki məlumata əsasən həyata keçiriləcək indeksasiyasının aparılmasını çətinləşdirəcək", - deyə R.Rzayev qeyd edib.
Maliyyəçilərin bəyanatlarına görə, indeksasiyanın 8-10 il ərzində tamamlanması planlaşdırılır. Maliyyə Nazirliyində indeksasiyanın keçirilməsi üçün üç variant var: 0,3-0,4 mlrd. ABŞ dolları tələb edən, 0,5-0,55 mlrd. ABŞ dolları tələb edən və 0,8-1 mlrd. ABŞ dolları tələb edən. Kapital Bankda keçirilmiş inventarlaşdırma zamanı 1 mln. 986 min əmanətçi aşkar olunub.
