Azərbaycan hökuməti və Dünya Bankı ölkənin DB ilə əməkdaşlıq strategiyasında (2006-09-cu illər) mübahisəli məsələlərin həllinə nail olub. Hökumətdən Trend ə verilən məlumata görə, bu sənəddə bir çox məqamların dəyişilməsinə nail olunub. "Həmin sənəddə BVF və digər materiallara əsaslanaraq, Azərbaycanın maraqlarına zidd məqamlar öz əksini tapmışdı. Son nəticədə isə qaçqın və məcburi köçkünlərin problemləri və bu problemlə bağlı yaranmış vəziyyətin iqtisadiyyata təsiri məsələləri sənədə daxil edilib. Bizim iqtisadiyyata təqribən 1 mlrd. dollar həcmində ziyan dəyib", - deyə mənbədən verilən məlumatda deyilir.
Bu məsələlərdə hökumətin qərarı qəti olub və bütün etirazlara rəğmən həmin məsələlər sənədə daxil edilib. Strategiyanın son variantında bu məsələlər öz əksini tapıb. Həmin məsələlərin aydınlaşdırılıması ilə əlaqədar gecikmələr səbəbəindən sənədin deabrın 7-də Direktorlar Şurasında təsdiq olunması ehtimalı istisna edilir. Strategiyanın təxminən 2007-ci ilin yanvar ayında təsdiq olunacağı gözlənilir. Strategiyanın ümumi dəyəri 1,250 mlrd. dollar həcmində qiymətləndirilir ki, bu məbləğin də 79,4 mln. dolları Beynəlxalq İnkişaf Assosiasiyasının xətti ilə 2007-ci il üçün güzəştli kredit qismində ayrılacaq. Vəsaitin böyük hissəsi isə strategiya çərçivəsində Beynəlxalq Yenidənqurma və İnkişaf Bankının xətti ilə təqdim olunacaq.
Azərbaycanla əməkdaşlıq strategiyasında bank gələcəkdə təhsil sahəsində layihələrin maliyyələşdirilməsini, mühasibat uçotunun, su təchazatı və kanalizasiya sisteminin yaxşılaşdırılmasını, dəmir yolu şəbəkəsinin və kadastr qeydiyyatının inkişaf etdirilməsini planlaşdırır.
