Avropa komissiyası 2007-ci ilin yazında 2006-cı maliyyə ili üçün Tacis-in milli fəaliyyət planı çərçivəsində Azərbaycan üçün tvininq-proqramları hazırlamağı planlaşdırır.
Avropa Birliyinin texniki yardım proqramının koordinasiya bürosunun (Tacis) icraçı direktoru Əsgər Ələkbərovun Trend ə verdiyi xəbərə görə, artıq tvininq-proqrama daxil ediləcək layihələr formalaşmağa başlayıb. Cəmi 6 layihənin reallaşdırılması nəzərdə tutulub. Onların hər birinin reallaşma müddəti 12 aydan 18 aya qədər, dəyəri isə 1 mln. avrodur.
Tvinninq -proqramların ümumi büdcəsi 6,5 mln. avro təşkil edir, bundan 0,5 mln. avro proqram layihə ofisinin saxlanması üçün nəzərdə tutulub.
Ə.Ələkbərov qeyd edib ki, proqram çərçivəsində standartlaşdırma sisteminin təkmilləşdirilməsinə (Standartlaşdırma, metrologiya və patent üzrə agentlik üçün), məhsulun və dəniz məhsullarının keyfiyyət ekspertizasına texniki yardım (İqtisadi İnkişaf Nazirliyi yanında Ekspertiza mərkəzi üçün) nəzərdə tutulub. Qanunvericiliyin hazırlanması üçün kadr hazırlığı və parlamentin potensialının artırılmasında Milli Məclisə, Korrupsiya ilə mübarizə üzrə Dövlət komissiyasına, Dövlət əmlakının idarə edilməsi üzrə Dövlət komitəsinin potensialının yüksəldilməsinə yardım göstəriləcək.
Daha bir layihə AR və AB arasında energetika sahəsində əməkdaşlıq üzrə imzalanmış memorandumun implementasiyası üçün hazırlanacaq.
Ə.Ələkbərovun sözlərinə görə, hazırda xarici məsləhətçi özülün hazırlanmasına yardım edir. Onun əsasında ikinci mərhələdə hər bir layihə üzrə podratçılar texniki tapşırıqlar hazırlayacaqlar.