"Azərbaycan İnvestisiya Şirkəti" (AİŞ) SC fevralın 16-da Berlində keçiriləcək Azərbaycan-Almaniya biznes forumu çərçivəsində fəaliyyətinin təqdimatını keçirəcək.
AİŞ-nin icraçı direktoru Anar Axundovun Trend ə verdiyi məlumata əsasən, Azərbaycanın qeyri-neft sahəsinə sərmayə qoymaqda maraqlı olan alman şirkətləri ilə görüşdə iştirak etmək planlaşdırılıb.
"Onlar kənd təsərrüfatı, Azərbaycana Almaniya istehsalı olan avadanlıqların gətirilməsi sahəsində maraqlıdır. Digər tərəfdən, biz, investisiya şirkətlərinin iştirak imkanlarını yerində müzakirə etmək üçün Azərbaycan və Almaniya iş adamları arasında birbaşa danışıqlarda iştirak etmək istəyirik", deyə, A. Axundov bildirib.
Onun sözlərinə görə, əsas məqsəd Azərbaycan sahibkarları ilə əlaqələrə stimul vermək və birgə müəssisələrin yaradılmasıdır. İstənilən halda AİŞ minoritar səhmdarlar kimi iştirak edə bilər.
Biznes-forumun işində iki dövlətin rəsmi şəxsləri, ölkənin neft sahəsinin 30-dan çox biznesmeni iştirak edəcək. 150 alman şirkəti və təşkilatı qoşulacaq. Şirkətlər bank, telekommunikasiya, nəqliyyat, tikinti, aqrar və b. sahələri təmsil edir.
Biznes-forumun əsas hissəsi iki dövlətin biznesmenləri arasında danışıqlara həsr olunacaq və bunun da nəticəsində işgüzar müqavilələrin əldə olunması nəzərdə tutulub.
