Azərbaycan, Gəncə / Trend , müxbir V.Məmmədov/ Gəncə əhalisinin 15%-nin suya olan tələbatı tam ödənilmir. Yaxın gələcəkdə bu göstəricinin ehtiyac faizinin artacağı da ehtimal olunur.
Bu barədə bazar ertəsi Gəncə şəhər "Su-Kanal" Törəmə Açıq Səhmdar Cəmiyyətinin texniki işlər şöbəsinin aparıcı mühəndisi Məmməd Əkbərov məlumat verib. Onun sözlərinə görə, hazırda şəhər əhalisinin ildə minimum 25 min kubmetr suya ehtiyacı olsa da, bu məqsədlər üçün yalnız 19 min kubmetr su əldə edilir.
"Gəncə şəhərinin su anbarlarına Göygöl, Ağsu, Gəncəçay su hövzələrindən, 171artezian quyusundan və Şahsevənlər kəhrizindən su daxil olur. Lakin suya olan tələbatın get-gedə artması danılmazdır və yeni binalar istismara verildiyindən ciddi su qıtlığı ilə üzləşə bilərik" - deyə Əkbərov əlavə edib.
Gəncə əhalisinin su ilə təmin edilməsinə xidmət edən 54 su anbarı mövcuddur.
Gəncə paytaxt Bakıdan 365 kilometr qərbdə yerləşir.
