Azərbaycan, Bakı, 1 fevral / Trend , müxbir A.Bədəlova/ Almaniyanın RWE şirkəti "Nabukko" qaz kəmərinin tikinti layihəsinin idarə olunması üçün yaradılan "Nabucco Gas Pipeline Company"da 16,67 faiz iştirak payı alacaq. Bu barədə Trend a konsorsiumun mətbuat katibi Kristian Dolezal (Christian Dolezal) məlumat verib.
Onun sözlərinə görə, konsorsiumun 6-cı iştirakçısı gələn həftə elan olunacaq.
Almaniyanın RWE şirkəti fevralın 5-də Vyanada "Nabukko" layihəsinin 6-cı səhmdarı olacaq. Bu gün "Nabukko"nun iştirakçıları bərabər pay ilə Türkiyənin "Botas", Avstriyanın OMV, Macarıstanın MOL, Rumıniyanın "Transgaz" və Bolqarıstanın "Bulgargaz" (20 faiz üzrə ) şirkətləridir.
"RWE -nin "Nabukko" konsorsiumuna qoşulmasından sonra da səhmdarların iştirak payı bərabər bölüşdürüləcək" - deyə Dolezal vurğulayıb.
RWE-nin "Nabukko" layihəsində iştirakı əvvəllər planlaşdırılırdı, lakin "Nabukko" layihəsində Türkiyənin "Botas" nümayəndəliyindəki administrativ səbəblərdən təxirə salınıb.
"Nabukko" (6,6 mlrd dollar dəyərində) qaz kəməri üzrə Azərbaycan və Mərkəzi Asiyadan Türkiyə, Bolqarıstan və Rumıniyadan keçməklə Avropa İttifaqı ölkələrinə qaz tədarük olunacaq. Qaz Mərkəzi Asiyadan "Nabukko"ya Xəzərin dibi ilə çəkilməsi plnlaşdırılan Transxəzər qaz kəməri vasitəsilə tədarük oluna bilər. Tranxəzər qəz kəməri qaz ehtiyatının 6 trln. kubmetr olduğu güman olunan Azərbaycana qədər, Xəzər dənizi sahilindən isə Qazaxıstan və ya Türkmənistana çəkilə bilər. Azərbaycandan Orta Asiya qazı "Nabukko" qaz kəmərinə daxil olana qədər hazırda fəaliyyət göstərən Cənubi Qafqaz (Bakı-Tbilisi-Ərzrum) qaz kəməri vasitəsilə çatdırılacaq.
