Azərbaycan, Bakı, 19 fevral/ Trend , müxbir S.Əliyev/ Azərbaycanın onşor yataqlarında neft hasil edən əcnəbi iştirakla iri əməliyyat şirkəti Salyan Oil bu ildə birinci quyunun qazılmasını fevralın sonunadək başa çatdıracaq. Bu barədə çərşənbə axşamı şirkətdən bildiriblər. Quyu "Kürsangi" yatağında qazılır. Quyunun dərinliyi təqribən 4 min metr təşkil edir.
Hazırda əməliyyat şirkətinin yataqlarında gündəlik debit 760 ton təşkil edir. Yanvarda şirkət 23 min ton neft və 2,7 mln. kubmetr qaz hasil edib.
Əməliyyat şirkəti 2008-ci ildə altı istismar quyusu qazmaq niyyətindədir. Quyuların dərinliyi təxminən 3500-4000 metr təşkil edəcək. Bu il şirkətin büdcəsi $45,5 mln. səviyyəsində müəyyən edilib.
2007-ci ildə əməliyyat şirkəti, biri kəşfiyyat xarakterli olmaqla, altı quyu (biri 2006-cı ildən keçid) qazıb. Salyan Oil-in 2007-ci il üçün büdcəsi $43 mln. təşkil edib.
"Kürsangi-Qarabağlı"-nın işlənməsi sazişinin müddəti 25 il təşkil edir. Layihənin səhmdarları: ARDNŞ - 50 faiz və hər ikisi 25 faiz paya malik iki Çin şirkəti - China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK)
