Azərbaycan, Bakı, 01 avqust/ Trend , müxbir E.Ismayılov/ Azərbaycan Dövlət Neft Şirkətinin (ARDNŞ) Heydər Əliyev adına dərin özüllər zavodu oktyabrda "Ümid"dəniz qaz kondensatı strukturu üçün "Ümid-1" platformasının tikintisini başa çatdıracaq, - cümə günü zavoddan bildiriblər.
"Ümid-1"dəniz platformasının istismarı ARDNŞ-ə öz vəsaitləri hesabına işlənilən yataqlarda qaz hasilatının artırılması üzrə proqramın reallaşması çərçivəsində lazımdır. Proqrama uyğun olaraq, ARDNŞ-nin dövlətə təhvil verdiyi təbii qazın həcmi 8 milyard kub metr təşkil etməlidir. Cari ildə ARDNŞ 8 milyard kub metr qazın hasil edilməsini planlaşdırıb ki, bunun da 7 milyardı dövlətə təhvil veriləcək.
Tikintisi başa çatmayan "Çıraq" platformasının bazasında tikilən "Ümid-1" platforması, proqram çərçivəsində ən böyük obyekt hesab edilir. Onun hündürlüyü 72 m. olacaq. Platforma "Bulla-dəniz" dəniz yatağının 15 km.-də, 58 m. dərinlikdə yerləşəcək. Platformada altı qaz quyusunun qazılması nəzərdə tutulub.
"Kompleks-geoloji kəşfiyyat və topoqrafiya" İdarəsi avqustun sonunadək "Ümid" dəniz qaz kondensatında süxurların laborator tədqiqatını başa çatdıracaq. Sahənin tədqiqi onun etibarlığının və sahədə quraşdırılması nəzərdə tutulan "Ümid-1"platformasının gücünə dözə bilmək qabiliyyətinin müəyyən edilməsi üçün aparılır.
"Ümid" dəniz strukturunda təxmin edilən qaz ehtiyatları 200-300 milyard kub metr həcmində qiymətləndirilir.