Qazaxıstan, Astana, 11 avqust/ Trend , müxbir K.Konırova/ Azərbaycanın Dövlət Neft Şirkəti (ARDNŞ) Bakı -Novorossiysk neft kəməri ilə Azərbaycan neftinin nəqlinin artırılması xahişilə "Transneft" SŞ -yə müraciət edib, "Transneft"in vitse-prezidenti Mixail Barkov bildirib, -Vesti.ru xəbər verir.
"Əvvəllər Azərbaycandan ayda 83 min ton neft nəql edilirdisə, hazırda ay üzrə 166 min ton olacaq - yəni onlar ayda əlavə olaraq 83 min ton neft nəql etməyi xahiş ediblər", - Barkov bildirib.
Bununla yanaşı, vitse-prezident əlavə edib ki, boru kəmərinin texnoloji təmiri ilə əlaqədar bu ay göstərilən həcmdən artıq neft nəqlinə əlavə imkan yoxdur. "Əlavə imkanlar daha gec, təmir başa çatdıqdan sonra yaranacaq", - Barkov söyləyib.
Bakı -Novorossiysk boru kəmərinn operatoru Azərbaycanın Dövlət Neft Şirkətidir. Bu boru kəməri ilə Azərbaycan Dövlət Neft Şirkətinin öz yataqlarından hasil edilən neft, həmçinin, respublikanın quru ərazisində çalışan birgə müəssisələr və əməliyyat şirkətlərinin nefti nəql edilir. Yanğın nəticəsində Bakı -Tbilisi-Ceyhan boru kəməri ilə neft nəqli dayandırıldıqdan sonra, bu marşrut üzrə Azərbaycan Beynəlxalq Əməliyyat Şirkətinin "Azəri" - "Çıraq" - "Günəşli" yataqlarından hasil etdiyi neft də nəql olunur.
Müəlliflə əlaqə saxlamaq üçün elektron ünvan - [email protected]
