Azərbaycan, Bakı, 30 avqust/ Trend /Bu həftə Azərbaycan Dövlət Neft Şirkətinin (ARDNŞ) ekologiya İdarəsində Almaniyanın enerji agentliyinin nümayəndələri ilə görüş keçirilib, - İdarənin məlumatında deyilir.
Almaniyanın enerji agentliyi hökumət şirkətidir. Agentliyin əsas məqsədi - "Kiot protokolu"nun potensial təmiz inkişaf mexanizmi (TİM) layihələri haqqında məlumatın təqdim edilməsindən ibarətdir.
Görüşdə İdarənin nümayəndələri idarənin fəaliyyətinə və istixana qaz mənbələrinin TİM layihələri sahəsində inventarlaşdırılmasının aparılmasına dair yerinə yetirilmiş işlər, inventarlaşdırma nəticəsində müəyyən edilərək hazırlanmış beş potensial TİM layihələri haqqında məlumatı təqdim ediblər.
Əvvəllər ARDNŞ "28 May"və "Neft Daşları"Neft-Qaz Çıxarma Idarələrində "Kiot protokolu"nun təmiz inkişaf mexanizmi çərçivəsində, istixana effekti yaradan qaz tullantılarının inventarlaşdırma layihəsini hazırlayıb.
Bu layihələrin əsas məqsədi - istixana effekti yaradan qazların atmosferə buraxılmasının qarşısını almaqdan ibarətdir. Hazırda ARDNŞ bu istiqamətdə tərkibinə daxil olan müəssisələrdə və əməliyyat şirkətlərində məhsulların pay bölgüsünə dair müqavilələr çərçivəsində iş aparır.
"Kiot protokolu"1997-ci ildə imzalanıb. Protokolun imzalanmasında başlıca məqsəd - istixana effekti yaradan qaz tullantılarının planetdəki iqlim dəyişikliyinə səbəb olmayacaq səviyyəyə çatdırılmasından ibarətdir. Bu protokolu Azərbaycan 2000-ci ildə təsdiqləyib.
