Qazaxıstan, Astana, 03 oktyabr/ Trend , müxbir K.Konırova/ Qazaxıstanın "KazMunayqaz" (KMQ) şirkəti Gürcüstandakı biznes - layihələrini ixtisar etmək niyyətində deyil, - şirkətin vitse - prezidenti Daniyar Berlibayev Trend -a bildirib.
"Gürcüstandakı vəziyyətə baxmayaraq, milli şirkət özünün layihələrindən və bu ölkədəki aktivlərindən imtina etmək niyyətində deyil", - o qeyd edib.
Berlibayev bildirib ki, bu günlərdə Tbilisidə olub, Gürcüstanın Baş naziri ilə görüşüb və onunla söhbətində şirkətin planlarını təsdiqləyib. ""KazMunayqaz"ın "Tbilqaz"ı satmaq niyyətində olduğu barədə məlumatlar şaiyədir. Biz Batumidəki terminaldan imtina etmək niyyətində də deyilik", - KMQ-nin vitse-prezidenti bildirib.
"Rompetrol" neft konserninin Baş meneceri Dinu Patriçiu bu günlərdə "Rustavi" telekanalına müsahibəsində bildirib ki, KMQ Batumi limanından imtina etdiyi halda, Konsern onu almaq niyyətindədir.
Bir müddət əvvəl Trend xəbər verib ki, Dinu Patriçiu qazax neftinin Avropaya nəqli üzrə Batumi - Konstansa enerji körpüsünü tikməyi təklif edib. Cari ilin noyabrında Konstansa limanında yeni neft terminalı istismara verilməlidir. Bu terminal neftin Xəzər regionundan Cənubi Avropaya nəqli üçün "hab" olmalıdır.
Terminalın tikintisi "KazMunayqaz" milli şirkətinin səhmlərinin 75 faizini aldığı "Rompetrol"un qüvvələri ilə aparılır.
Müəlliflə əlaqə saxlamaq üçün elektron ünvan: [email protected]