Azərbaycan, Bakı, 10 dekabr/ Trend , müxbir S.Əliyev/ Hazırda "Şahdəniz" dəniz yatağındakı dörd hasilat quyusundan sutkalıq kondensat hasilatı layihənin birinci mərhələsi çərçivəsində, hasilat proqnozunun 45 min barelə bərabər olmasına baxmayaraq, 48 min bareli ötür, - layihəyə yaxın mənbə çərşənbə günü bildirib.
Azərbaycanda "Şahdəniz" qaz-kondensat yatağının işlənilməsinin birinci mərhələsi çərçivəsində qaz hasilatının ümumi həcmi 180 mlrd. kubmetr təşkil edəcək. "Şahdəniz" layihəsinin birinci mərhələsi çərçivəsində "mavi yanacağın" ən yüksək illik hasilatı 8,6 mlrd. kubmetrə çatacaq. 2008 - ci ildə yataqdan 7,7 mlrd. kubmetr həcmində qaz istehsal ediləcəyi gözlənilir.
"Şahdəniz" dəniz yatağının işlənilməsinə dair müqavilə 1996 - cı il iyunun 4 - də imzalanıb. Müqavilənin iştirakçıları aşağıdakılardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ARDNŞ - 10 faiz. Bu yataqda ümumi qaz ehtiyatları 1,2 trln. kubmetr qiymətləndirilir.
Bu yataqdan hasilat 2006 - cı ilin dekabrında başlayıb. Hazırda qaz Cənubi Qafqaz qaz kəməri ilə Gürcüstan və Türkiyəyə nəql edilir. Azərbaycan da qazın alıcısı kimi çıxış edir. Kondensat Bakı - Tbilisi - Ceyhan boru kəməri ilə nəql olunur.
Müəlliflə əlaqə saxlamaq üçün elektron ünvan: [email protected]