Azərbaycan, Bakı, 19 fevral / Trend / Yanvarda Bakı-Tbilisi-Ceyhan (BTC) neft kəməri ilə 161,1 min ton həcmində "Tengiz" yatağından çıxarılan Qazaxıstan nefti ixrac olunub. Bu barədə Azərbaycan Dövlət Statistika Komitəsindən məlumat verilib.
2008-ci ildə (oktyabr-dekabr) BTC ilə 285,1 min ton Qazaxıstan nefti nəql olunub. Amerikanın ChevronTexaco şirkəti 2008-ci ilin oktyabrında BTC ilə Tengiz neftini nəql etməyə başlayıb. Sazişin şərtlərinə əsasən, Tengiz nefti Bakı-Tbilsi-Ceyhan boru kəməri və dəmir yolu ilə Gürcüstanın Kulevi və Batumi limanlarına nəql olunacaq.
Nəql olunan neft həcmlərinin ildə dörd mln. tona qədər artırılacağı gözlənilir.
ChevronTexaco Qazaxıstanın "Tengiz" yatağının operatorudur. Müqavilə sahəsinin istismarı ilə "Tengizşevroyl" əməliyyat şirkəti məşğul olur.
BTC neft kəmərinin ümumi uzunluğu 1768 km-dır. Boru kəmərinin 443 km-i Azərbaycan, 249 km-i Gürcüstan; 1076 km-i isə Türkiyə ərazisindən keçir.
"BTC Co"nun səhmdarları: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).
Gürcüstanın Qara dəniz Kulevi terminalının sahibi ARDNŞ, Batumi terminalının isə "KazMunayQaz" şirkətləridir.
