Azərbaycan, Bakı, 08 aprel / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) yayadək "Günəşli" yatağında yerləşən "Günəşli-13" platformasında qazkondensat istismar quyusunun qazmasını başa çatdırmağı planlaşdırır. Bu barədə çərşənbə günü SOCAR-da işlərə yaxın mənbə bildirib.
"Platformada qazma işləri artıq başlanıb və burada qazma ağır getdiyindən işlərin iki, yaxud iki ay yarıma başa çatdırılması planlaşdırılır", - deyə mənbə bildirib.
Quyunun layihə dərinliyi 3700 metrdir, hazırda isə 2300 metr. Quyu qaz və qazkondensat üçün qazılır.
SOCAR "Günəşli-11" platformasında da qazkondensat quyusu qazır. Yeni quyunun layihə dərinliyi 3900 metrdir, hazırda isə o, təqribən min metr təşkil edir. Bu platformada qazma işlərinin üç aya başa çatdırılması planlaşdırılır.
Bütün quyular "28 May" Neft-Qaz Çıxarma İdarəsinin (NQÇİ) balansına daxil ediləcək.
"Günəşli" SOCAR-ın müstəqil şəkildə istismar etdiyi ən iri neft-qaz yatağıdır. SOCAR tərəfindən hasil edilən neftin ümumi həcminin 60 faizi, qazın isə 70 faizi onun payına düşür.
Yeni quyuların qazılması SOCAR-ın təsdiq etdiyi "Günəşli" dəniz neft-qaz yatağını istismar edən "28 May" NQÇİ-nin 2008-2010-cu illər yeni inkişaf proqramı çərçivəsində həyata keçirilir. Proqram çərçivəsində neft hasilatının stabilləşdirilməsi və təbii qaz hasilatı həcminin artırılması planlaşdırılıb.
Məqalə müəllifi ilə əlaqə ünvanı: [email protected]