Azərbaycan, Bakı, 22 may / Trend , müxbir E.İsmayılov /
Azərbaycan qazının Rusiyaya satılması ilə bağlı hələ ki, konkret nəticə əldə edilməyib. Bu barədə cümə günü Azərbaycanın sənaye və energetika naziri Natiq Əliyev deyib.
"Danışıqlar aparılsa da hələ ki, məsələ ilə bağlı konkret nəticə əldə edilməyib", - Əliyev qeyd edib.
Nazirin sözlərinə əsasən, qaz satışı yüngül proses deyil, mövcud olan infrastrukturun yenidən qurulması üçün iri kapital yatırımları lazımdır. Burda 0,5-1 milyard kubmetr qazdan söhbət getmir", - nazir bildirib.
Bir müddət öncə SOCAR (Azərbaycan Respublikası Dövlət Neft Şirkəti) və "Qazprom" qarşılıqlı anlaşma haqqında memorandum imzalayıb. Memoranduma əsasən, tərəflər arasında Azərbaycan-Rusiya sərhədinə qədər təchizata 2010-cu ilin yanvar ayından başlayaraq Azərbaycan qazının alqı-satqısı barədə danışıqlar nəzərdə tutulub. Memorandum çərçivəsində qarşılıqlı qaz mübadiləsi məsələsi də müzakirə obyekti olacaq.
Razılaşma qarşılıqlı təcrübə mübadiləsi proqramının işlənməsini, kursların təşkil edilməsini, tədris seminarlarının təşkilini nəzərdə tutur.
Əliyevin sözlərinə əsasən, "Rusiya Azərbaycandan qazı Avropa qiymətlərinə uyğun almaq niyyətindədir. Lakin aydınlaşdırmaq lazımdır ki, belə dedikdə Rusiya nəyi nəzərdə tutur". Nazir əlavə edib ki, qaz nəqli zamanı bir sıra əlavə xərclər, tranzit və fiskal problemlər meydana çıxdığından məsələ heç də asan olmadığı üçün danışıqlar davam etdiriləcək.
"Qaz satan ölkə təchizatın uzunmüddətli olduğuna əmin olmalıdır. Çünki təchizat yerinə yetirilmədikdə müəyyən sanksiyalar tətbiq edilir. Nəticədə kommersiya baxımından daha sərfəli varianta üstünlük verilməlidir", - Əliyev vuğulayıb.
Məqalə müyəllifi ilə əlaqə ünvanı: [email protected]
