Azərbaycan, Bakı, 06 iyul / Trend , Ə.Bədəlova /
İsveçin sədrliyi altında energetika sahəsi əvvəl olduğu kimi, yenə də Avropa İttifaqının mühüm istiqamətlərindən biri olaraq qalacaq, Avropa Komissiyasının energetika məsələləri üzrə nümayəndəsi Ferran Tarradellas-Espuni deyib.
"Avropa İttifaqına sədrlik edən İsveç artıq bildirib ki, energetika, xüsusilə enerji təchizatı təhlükəsizliyi onun vacib sahələrindən biri olacaq," - Trend -a elektron poçtla Tarradellas-Espuni məlumat verib.
Avropa İttifaqında rotasiya sədrliyi iyulun 1-dən etibarən yarımil müddətinə Çexiyadan İsveçə keçib. Stokholm vacib məsələlərin siyahısına xüsusi olaraq maliyyə böhranı və işsizliyə qarşı mübarizə, Aİ-də təhlükəsizlik məsələləri, həmçinin iqlim dəyişikliklərinin qarşısının alınması məsələlərini daxil edib.
Avropa Komissiyası nümayəndəsinin sözlərinə görə, "Cənub dəhlizi" layihəsi üzərində aparılan fasiləsiz iş davam etdiriləcək.
"İsveç artıq enerji diversifikasiya planı və Şərq tərəfdaşlığına dəstəklə bağlı həmrəy olduğunu nümayiş etdirib", - o qeyd edib.
"Cənub dəhlizi" layihəsi Avropa İttifaqı üçün qaz təchizatının diversifikasiyası və Avropa enerji təhlükəsizliyinin gücləndirilməsi baxımından vacib bir layihədir. Bu layihənin tərkib hissəsi olan Nabukko qaz kəməri qazın Xəzər regionundan Avropa ölkələrinə ötürülməsi üçün nəzərdə tutulub. Neft kəmərinin tikintisi 2011-ci ildə başlamaq planlaşdırılıb, ilkin tədarükklər isə 2014-cü ildə başlanacaq. Boru kəmərinin maksimum gücü ildə 31 milyard kubmetr təşkil edəcək. İyulun 13-də Ankarada Avropa İttifaqı ölkələri ilə Türkiyə arasında layihə ilə bağlı hökumətlərarası razılaşma imzalanacaq.
Məqalə müəllifi ilə əlaqə: [email protected]
