Azərbaycan, Bakı, 18 avqust / Trend /
BP şirkəti 2010-cu ilin ikinci rübündə "Azəri-Çıraq-Günəşli" (AÇG) (yatağın işlənməsi üzrə operator BP şirkətidir) yatağında növbəti beş quyu üçün sudoldurma sisteminin yaradılması və buraxılış-qəbul yoxlanışını başa çatdırmağı planlaşdırır. Bu barədə şirkətdən məlumat verilib. Bu, 13 quyu vasitəsilə "Günəşli" yatağının dərinsulu hissəsinin təbəqə-kollektoruna sutkada 530 min barel su doldurmağa imkan verəcək.
STEP proqramı (Sanqaçal terminalının genişləndirilməsi proqramı) çərçivəsində səmt (təbəqə) suları üçün qurğu və mexanizmlərin istismara verilməsi üzrə iş aparılır. 2008-ci ilin sonunda BP layihənin 1-3-cü fazası üzrə işi başa çatdırıb və 2009-cu ilin martında "Mərkəzi Azəri" yatağında suyun daşınmasına başlayıb. AÇG təbəqəsinə səmt sularının təkrar doldurulması bu il iyulun əvvəlində həyata keçirilib. Dördüncü və beşinci faza çərçivəsində obyektlər bu il sentyabrın sonunda istifadəyə veriləcək.
AÇG layihəsi üzrə sonrakı işlər dördüncü və beşinci faza üzrə səmt suyu üçün obyektlərin buraxılış-qəbul yoxlanışını (2009-cu ilin üçüncü rübü), sudoldurma üçün əlavə avadanlıqların quraşdırılmasını (2010-cu ilin birinci və ikinci rübü), "Çıraq neft layihəsi"nin icra mərhələsinə keçidi (2009-cu ilin dördüncü rübü) nəzərdə tutur.
